Bonvenon! (Esperanto)
Majo 29, 2017
Lastaj novaĵoj de Japanio
-----------------------------------------
(n-ro 276, 2017.5.28)
------------------------------
"Uzado de virtuala mono disvastiĝas."

La virtuala mono estas cifereca mono
akceptata nur en speciala virtuala
komunumo, kaj ĝi ne estas agnoskita
kiel laŭleĝa mono. Lastatempe, tamen,
ankaŭ en Japanio nemalmultaj homoj
uzas ĝin kiel oportunan pagometodon.

Nun precipe en Eŭropo, Usono kaj
Ĉinio, "Bitmono" akiras popularecon.
Bitmono (angle: Bitcoin) estas unu
el la virtualaj monoj kaj la
pagometodoj. La unuo kaj la simbolo
de Bitmono estas BTC. Oni povas uzi
ĝin preskaŭ ĉie en la tuta mondo,
elspezante relative malaltan kurtaĝon
pro ĝia uzo.

La 7an de aprilo Bic Camera, la granda
podetala ĉenbutiko de hejmaj elektraj
aparatoj, ebligis al siaj klientoj
fari pagojn per Bitmono en du butikoj
en Tokio. La klientoj direktas sian
lertan poŝtelefonon al terminaloj por
Bitmono en tiuj butikoj kaj pagas
la sumon indikitan sur la ekrano per
monounuo "BTC".

La enkonduko de tiu nova pagometodo
intencas alvoki precipe al alilandaj
turistoj rapide plimultiĝantaj
lastatempe. Oni atendas, ke ili
utiligos tiun oportunan kaj
malmultekostan pagometodon, ĉar
ili ne bezonos monŝanĝi (ekz. de
dolaro al eno) kaj povos ŝpari la
monŝanĝ-kurtaĝon de ĉ. 3 procentoj.

Oni taksas, ke ĉ. 5 000 butikoj en la
tuta Japanio ebligas al klientoj uzi
Bitmonon en la komenco de ĉi-aprilo,
kaj pli kaj pli grandiĝas la uzado
inter japanoj. Ekzemple, en la
popolamasa suŝiejo "Ginza-Numazu-Ko",
kie klientoj povas laŭplaĉe preni
rondirantajn suŝiojn de sur la
transportbendo, la nombro de pagoj
faritaj ĉiumonate per Bitmono kreskis
de nur kelkaj antaŭ du jaroj ĝis 70
en marto ĉi-jare.

Oni pensas, ke Bitmono tiel disvastiĝas
kaŭze de tio, ke la amendita Leĝo pri
Pagometodoj validiĝis la 1an de
ĉi-aprilo. La leĝo agnoskas virtualan
monon kiel pagometodon aldone al
aĉetkupono, antaŭpagita karto kaj
aliaj pagometodoj preskribitaj en la
origina leĝo.

Plie, de julio oni ne plu bezonos pagi
la 8-procentan konsumimposton por
akiri Bitmonon. Antaŭe virtuala mono
estis konsiderata kiel "varo" kaj oni
devis pagi la imposton, kiam oni
"aĉetis" ĝin. KANO Yuzo, la prezidanto
de la firmao bitFlyer kiu administras
la borson de Bitmono, diras, ke sub tiaj
favoraj cirkonstancoj pli kaj pli da
butikoj enkondukos Bitmonon kiel
pagometodon. Li atendas plian
disvastiĝon de Bitmono.

Disvastiĝo de virtualaj monoj en
Japanio tamen kaŭzas pli kaj pli
multajn konfliktojn. Laŭ la Nacia
Centro pri Konsumant-Aferoj de
Japanio, la nombro de konsultoj
rilataj al la aĉeto de virtualaj monoj
en 2016 atingis 634, pli ol trioblon
de la sumo 194 antaŭ 2 jaroj.

Multaj el tiuj konsultintoj estis eble
trompitaj de fraŭdistoj, kiuj fripone
invitis la naivulojn "investi" monon
en virtualaj monoj. La registaro do
komencis konsideri rimedojn por protekti
konsumantojn, inkluzive de plifortigita
kontrolado de la koncernaj borsoj.Tamen
nun ankoraŭ ne ekzistas klaraj leĝoj
kaj reguloj koncerne al virtualaj monoj.

Krome, oni ankoraŭ ne decidis, kiel
pritrakti virtualajn monojn en kontado
aŭ librotenado de la kompania kaso,
kiujn kompanioj posedas. De nun, estas
nepre necese enkonduki pliajn leĝojn
por fari favorajn cirkonstancojn, tiel
ke oni povu trankvile uzi virtualajn
monojn.

------------------------------
Sezonvortoj en Japanio
(197)Densa Verdo
===
La densa verdo estas koloro de
freŝaj junaj folioj kiuj nove ĝermis
en la malfrua printempo aŭ frua
somero.
-----------------------------
Olimpiaj vortoj por 2020, Tokio
(181:Korbopilko:3)
Ŝoto por tri poentoj
===
---------------------------------
日本語訳のついた、
*過去のニュースは、このサイトで読むことができます。
* Vi povas legi en tiu ĉi retejo malnovajn numerojn
de "Lasta Novaĵo de Japanio" , kiuj inkluzivas la
japanajn versiojn (n-ro 1-222)

*過去のニュースで、「エスペラント(La Revuo Orienta)
誌に「Novaĵoj hokitaj de Okita」というタイトルで掲載
されたもの等は、録音とともに、このサイトで聞くことが
できます。
Vi povas aŭdi kaj legi en tiu ĉi retejo, lastajn artikolojn
aperintajn en la"Novaĵoj hokitaj de Okita" de la monata
gazeto "La Revuo Orienta" ktp.

*過去の歳時記は、このサイトで読むことができます。
*Vi povas legi en tiu ĉi retejo malnovajn numerojn
de "Sezonvortoj en Japanio", kiuj inkluzivas la japanan
version (n-ro 1-143).

*過去のオリンピック関連用語は、このサイトで読む
ことができます。(工事中で未完成)

*エスペラント訳がむずかしかった用語は、こちらのサイト
にまとめました。(工事中、未完成)

トップページへ

エスペラントについて知りたい方は、下記のHPを
ご覧下さい

日本エスペラント協会

エスペラント関係の団体、エスペランティストの
HPは、エスペラント関係リンク集をご覧下さい。


To Top Page/
To Nidokai Page